كتابات أخرى للكاتب على موقع الناس

السبت 25/5/ 2013

سلسلة "سوالف الشعب" (8) د. مزاحم مبارك مال الله • ليش هَيج يبو مظلوم ،(كالولي الربع) ،ليش اخذت أبو فاطمة لستاد أبو العدالة وما حجيت ولا كلت؟ شنهي شلكيتنه ،ما أنبيض الوجه ،زغار ،ما نعرف نحجي ،لو شنهي غصدك ،كول ،ما بيها شي ،وأحنة من عين هلساعة بعد ما تشوفنة! - علكيفكم ،علكيفكم! شنهي السالفة، بوية أنتَم فاهمين قلط ،الريال أجاني بالليل سعلني جم سعال ،وآنة يبعد أخوكم كلشي ما أخرّج ،أخذته ورحت لبو العدالة ،وهاذ هو كدامكم ،أنشدوه ،تمام بوية أبو فطيم لولا؟ ** أي والله بختي ،بحظي كل الكالة أبو مظلوم صحيح ،خصوصاً هو كلشي ما يخرّج! - وهسة شتامرون؟ • ابو مظلوم ولايهون ابو فاطمة، ترة الوضع كلش ما هو زين ،يخوّف ،وأحنا أذا طكت يخوية وين ننطي ووجوهنا؟ - أي شتردون ،آخذكم لبو العدالة يشوفلكم مجان! • بوية يا مجان ،يامجان أبو مظلوم لاتغشم روحك، فدوة أروحنلك، جا من صفحة تباوع على أصبيعاتنا رحنا للأنتخاب لو ما رحنا ،هاي تعرفله ، بس من أنكلك ودينة لبو العدالة يورجنا ،تسوي روحك ،كلش ،هينوب ،كلشي ما تعرِف! - يعني شتردون يكللكم؟ • خلي يسولفنة، علهل الطركاعة راح أطيح على روس الوادم، شنهي جا همّة شالوا مشعول الصفحة ذاك علمود يسوونها طائفية؟ يعني جانت البلوة سنة يحكمون وشيعة مايحكمون؟ المصيبة جانت باللي يبعون العركك؟ اللغوة علمود الأغاليم؟ شو جنها شليلة وضايع راسها! وياجماعة الخير آنة عمري كله ما سمعت ريس وزرة يكول "راح أتصير حرب اهلية" ،شنهي جا هو متونس ع هل السالفة؟ **(دخل أبو العدالة لما عرف أن الربع ملتمين يم ابو مظلوم)، هلة بيك خوية، هسة جنة بطاريك ،وجميعهم بصوت واحد : مساكم الله بالخير، # الله بالخير هلة بيكم ،ياهلة ،ها ياجماعة الخير خيراً ،عرفت تردون أتشرفوني أبيتي، هلة بيكم بأي وكت، • خوية ابو العدالة ،ترة بصراحة ما نلكة حجاية الصدكك ألاّ عدك، وأحنة جينة متعنين عليك حتى أتسولفنة ،البلد وين ماشي؟ # أشكرك خوية أبو حياة ،وسؤالك كلش عظيم وجبير ،شوفوا ياجماعة الخير ، بالبلد هسة اكو معركة بين الخير والشر،ولا تصدكون أكو حرب بين السنة والشيعة لأن صارلهم مئات السنين سوة متخاوين، الحرب الحقيقية ترة بين القادة الدينيين السنة وبين القادة الدينيين الشيعة ،ومعركتهم تراهي عل الكراسي مو حباً بالسنة أو بالشيعة ،هاي وحدة ،والثانية ،جا أبيش يلهوّن البسطاء؟ لازم أيدكون على الوتر الحساس، الوتر الطائفي بالغربية والشرجية والوسط ،ولمن يصعدون شوية فوكك ،يلهوّن العالم بالصراع القومي،والحبل علجرار،وصاحبنا ماعنده غير بس "المؤامرات الخارجية ،والتدخل الخارجي" وهو يدري او مايدري انو هو واللي امثاله من الجهة الثانية همّة السبب بالمؤامرات الخارجية وغيرها. ياجماعة الخير أنتم أمصدكين ماكو كهرباء؟ لا،بس اللازمين الحكم مستفيدين من المولدات ،أنتم أمصدكين المشاريع ما جاي تكمل؟لا، بس أكو فساد أداري ومالي ،أنتم مصدكين الحكومة مسيطرة على الوضع الامني؟ لا،ما دامهم يغازلون البعثية والمليشيات ، و.. • بوية ترة مامش حكومة الله وكيلكم! شنهي مسلحين يطبون يكتلون بأخوانا اليزيدية ،ومسلحين يطبون على البيوت ويكتلون اللي بيها ،وسيطرات وهمية ، شنهي تعيين الكرايب بس؟ ،شنهي وزراء ما يداومون؟ شنهي هل الفساد؟ شنهي مدري شنهي؟ ،جا هي حكومة لو محكومة؟! # يا جماعة الخير،ترة العراق بخير أذا الافندية سمعوا حجي الوطنيين الشرفاء، اذا سمعوا حجي العاقلين من الوطنيين، ولزمن أنسوي حملة ضد صوت الحرب، ضد حمَلة المشروع الطائفي وضد الانفراد والتفرد ** عاش حلكك أبو العدالة ،ومثل ماهم يريدون أيشعلونها ،ترة أحنة أنطفيها ،ها جماعة الخير ،كوموا ،كومونا انروح لساحة التحرير وانهوس هناك ويه اللي يحبون الوطن والشعب ،ترة النصر الهم ،لأن كل الوادم تريدهم وتريد خاطرهم وتحترمهم وتحبهم ،ناس ما يعرفون الجذب ،وأيدهم نظيفة.. • بس كبل ما أنكوم ياجماعة الخير ،بلله رضيتوا باللي سووه الاردنيين ذاك اليوم؟ # أبو حياة، هاي ولاءات بالأموال يعني مدفوعة الثمن، ياصديم يابطيخ ، همّ يبولون على جريدي الحفرة، بس الفلوس حلوة يبو حياة! ،ذمم مشترينها بالفلوس ،مثل ما الربع أشتروا الاصوات بأنتخابات مجالس المحافظات • ها جا من هَيَج الجماعة رواتبهم عالية ،علمود يشترون الذمم ،وهستوني عرفت ليش ياخذون بلوكات فلوس جديدة موش فلوس مشككة والطلايب اتصير عليها ...