كتابات أخرى للكاتب على موقع الناس

الثلاثاء 6/1/ 2009

بمناسبة ذكرى ثورة سيد الشهداء أبو الأحرار الأمام الحسين (ع) حسين جهيد الحافظ هاجس اِيدور اِبضميري طرز اِسنيني محنه فيض اِبروحي الحنين وطشني بأوراق الحدايق طشني وردة ياسمين ورد جمعني اِويه الألم وي الونين وگال اِكتب ,... أكتب اِلمن ؟ گال اِكتب للحسين شلت قلمي ... اِلگيت عاشور اِويه قلمي شايل الضدّين فرحان وحزين الفرح المن سألته ؟ گال لاِسمي ... اِسمي عاشور الحسين والحزن ؟ ....گاللي حزن الطفوف الما گدر يمحيه كل حزن السنين وآخ يا حزن الطفوف عاشر الدنيه اِبكبرهه عشرة اِبنادم وظلّه... وهاك شوف گلبت كل القواميس وعدتهه چلمه چلمه وگمت بيهه اِبشوگ أطوف دورت كل الجمل... كل السطور ... والحروف فتشتهه اِمن الألف للياء ما لگيت اِحروف تگدر للرثاء ولا شفت چلمات توصف هل الوفاء بيش أوصف حسين وحسين النقاء حسين ثوره حسين حريه وكرامه حسين بس بحسين يتباهه الفداء حبري جف ولاذ قلمي اِسد اديّه لاذ أشوفه اِتراده حاله والوصف گصر خياله گال أدري حسين مچتول ويهنياله هذا يا مچتول منه اِيخاف چتّاله وهذا يا ميت يحامي اِبموتته اِعياله هذا بس حسين .... هو حسين واحد بيه يتباهه الزمان وباقي خالد... باقي خالد