|  الناس  |  المقالات  |  الثقافية  |  ذكريات  |  المكتبة  |  كتّاب الناس  |
 

     
 

الأربعاء  1  / 10  / 2008                                 زكي رضا                                   كتابات أخرى للكاتب على موقع الناس

 
 

 

حچايات من طرفنا
(3)

زكي رضا
(موقع الناس) 

الجعفري يتحدى والعطار يجيب
رمى سالم خنجي , الصحيفة التي يقرأها ( بالمجان طبعا ) عادة , عند صباح ابو الجرايد من يديه . واسرع مهرولا , الى مقهى ابو سامي , وقطع المسافة بين الساحة التي تباع فيها الصحف , والمقهى بسرعة قياسية , تؤهله الاشتراك والحصول , على ميدالية ذهبية في الاولمبياد القادم . ووقف امام ابو سامي الذي تفاجأ به متقطع الانفاس.

..... خيرك سالم .... شكو شبيك .
..... .....................
..... متحجي هاك هاي كلاص ماي واستريح ( مؤشرا على احدى العلب ) .
فتناول سالم قدح الماء, وجلس على ( الكرويته ) قائلا هسه افهمك خلي اشرب الماي الاول .
..... اكول ابو سامي , هاي انت شلون دائما اتكول , من انه الاسلاميين سنه وشيعه وياهم القوميين والبعثيين والاحتلال . همه اللي مسؤولين عن كل هاي البلاوي اللي دتصير بالبلد .
..... لعد منو المسؤول يابه , جاسميه الدلاله ؟ .
..... لا اغاتي , بس انت اتحب دائما اتشوه وجه الاحزاب الاسلاميه . لانه جماعتك الليبراليين والديموقراطيين ومدري منو , همه المسؤولين عن كل هاي الخربطات .
..... اول مره عبر, انت مطلوب 300 جاي , ثانيا بعد لتجي هنا اذا متدفع , ثالثا هذا يا لوتي اللي كلك ؟ .
..... عليكفك ابو سامي , باجر الحكومه توزع 10 بالميه من فلوس النفط , على المواطنين وادفع فلوسك كلهه , هاي اولا . وثانيا اني هسه قريت بالجريدة , من انه السيد الجعفري الله يحفظه ويطول بعمره , كال اذا يريد واحد من جماعتك اللي يتهمون الاسلاميين , بكل هذا الخراب يتناقش وياه , وبيه زود خل يجي .
وسقط ابو سامي على الارض (وتكسرت الاستكانات والقوري ) من شدة الضحك قائلا ...
..... لك انت صدك مخرف , انت بعمرك شايف مله يدفع فلوس , هذوله من قال وبني بس ياخذون . وبعدين اني ما اكدر اناقش الجعفري , لان تلت ارباع حجيه ما افتهمه . بس كوم نروح يم داود العطار, لانه يقره كتب تاريخ ليل ونهار . طبعا عنده وكت هوايه , لان مشتريته ما شاء الله كلهم مثلك حتى نسأله .
وبعد ان شرح الاثنان الموقف لداود العطار . اجاب وهو يتناول نظارته الطبية , شارحا الموقف ....
..... اولا مال واحد يتناظر ويه الجعفري , فما اعتقد واحد ايسويهه . لان الجماعة الاسلاميين , كلهم خاشين دورات ملاكمه . وثانيا اكو مقولة تكول , اذا لم تستحي فأصنع ما شئت . والظاهر ان الاخوه الاسلاميين يطبقوها 100 بالميه , لان البخاري ايكول هذي من احاديث الرسول .
..... يعني شلون تساءل سالم خنجي ؟
..... شوفو ياجماعه , اولا الحكومة حكومة محاصصة , متشكله من خمس احزاب . 2 شيعه و 2 اكراد وواحد من السنه , واكو جم واحد من الليبراليين والديموقراطيين . يعني نسبة الحرامية بالحكومه , اكثر من المو حراميه . وبعدين اني اسأل الجعفري ..... منو المسؤول عن التهجير الطائفي , وتفجير المساجد والحسينيات , وقلة الخدمات وكتل الناس بالشوارع . والكوليرا وتنظيف العراق من الاقليات , ومحاولات بيع العراق الى دول الجوار . ومنو عنده ميليشيات , ومنو يوميه امعزلهه للولايه ومطلع الناس مشايه . او منو بمجلس المحافظة اللي يبني حديقه ب 14 مليون دولار . وبعدين باللغة , كلمة صلاح ضد فساد , والاصلاح ضد الافساد . وهو طلع من ربعه وسوه تجمع , سماه تجمع الاصلاح , وهذا يعني انه اللي كان وياهم سابقا , فاسدين ومفسدين . وبعدين النبي الكريم ميرضه على هيجي ناس .
..... ليش تساءل كلاهما ؟
..... لانه دائما يدور مصطلحات متفتهمه الناس , بالعربي يكولون ( يتقعر في كلامه ويبحث عن الوحشي من الالفاظ ) , و لانه النبي والائمه والصحابه , جانو ميقبلون على اللحن بالكلام.
ويكولون انه فد يوم , اعرابي دخل مجلس ابو جعفر المنصور, وجان ديخطب والمنصور لحن , فالاعرابي ضاج . وره شويه هم لحن , وهالمره صاحبنا سد اذنه . وره شويه المنصور هم لحن , فالاعرابي كام وكله ( اشهد من انك توليت هذا الامر قضاءا وقدر )
عندها مسك سالم خنجي يد ابو سامي خارجا من الدكان ليصيح بعلو صوته ... اشهد من ان الجعفري وربعه تولو امر العراق قضاءا وقدر .
ثم اردف هامسا في اذنه ابروح ابوك ابو سامي , شنو يعني قضاء وقدر .

 

1 / 10 / 2008
الدنمارك


 

 

 Since 17/01/05. 
free web counter
web counter