كتابات أخرى للكاتب على موقع الناس

 

الأربعاء 1/9/ 2010

ملاحظة مهمة عذرا للجميع ، لأني لم أنشر قصائدي المهداة لحزب الفقراء الحزب الشيوعي العراقي بسبب عدم معرفتي استخدام الحاسوب والأنترنيت سابقا ، لذا أستميحكم العذر لنشرها بدءا من قصيدة العيد الواحد والسبعون ، وسأنشرها تباعا . عيون الشعب حامد كعيد الجبوري حبيت الوطن وأكتب شعر للناس وأتمنه الوطن مهيوب أتمنه ما ذليت قلمي ولا بحت سري ولابعت الضمير الباعه مومنَه تمثال الثلج ما مجدت تمثال لأن أدري الشمس تمثال موعنه أكرهت كل الظلام وأذبحه أبشمعه أبثكل ضيم الليالي السود ضكنه واليحب العراق أيوّج ألَه شمعه وشمعه فوك شمعه الكون يضوّنه جتف الجتف يسند نعمُر المهدوم نصراني ويزيدي وشيعته وسنه ومن كاع الوطن حنه وعلك وأبخور ولطفال العراق أنشيد الجنه *** أطب بيت الحزب وأتصدر الديوان وأكـتب للحزب أشعار وأتغنه ما عوكت رجلي ولو غبت يسأل صديق وللصديق أيفكده يتعنه يا خبزة حلال أبعرك مكسوبه ما ياكل حرام ولا يعرفّنه نهرين الحزب صبن فرح وأشعار كل بيت أبعراقي الطيب رونّه ما تدفع رواتب توعد أبدولار من لكمة رفاقك حزبك أبننه *** كلبك ينبض وشريانه من شعبك ومن دم الشعب بيبانك أتحنه ملجأ للفقير وصاحب الحاجه واليوجي اعله بابك ما كطع ظنه مايطلب كراسي ولا ركض ليها أشماتصير الكراسي ما تكبرنه أذا غيره أعتقد يتشرف أبمنصب يشرفها المناصب ما تشرفنه ما سديت بابك لا عزت ناطور لأن أنت الشعب وعيونه حرسنه يطبلك قاتلك وتهلي وتمرحب يموت أبحسرته وهمومه ذبنه عكارب والعكارب من تريد تجيب تنهش بطن أمها أبسمها شكنه *** ميزني أعله ولده أولده فرحولي وكراريس الحزب أشعاري كتبنه شعري مو عواطف لامجد شخصي مواقف للشرف تاريخي سجلنه رائد مقتدر (عريان) وأسمي أوياه وفرق واضح جبير أبشعري وبفنه شفت الحزب خيمه وجمعة الطيبين مو بس للشيوعي الشعب لمنه جيفاره رمز والتقتديه أبطال أشجم (جيفاره) منه أبدمه جفنه *** تركض رفقتك فزاعه للزينات شهامه ومرجله وطيبات وأمحنه جاكوج المعامل ركّص العمال السنابل هلهلت لفراح منجلنه (كوكبنه) يلحنها ويغنيها كل شفة عراقي بوسه زوكنه يغلب للشباب وعده عالسبعين لاصابه ملل لجروحه ضهدنه تشل جرح العراق وجرحك سهجته أجروح الواحد وسبعين ضمدنه *** العراق أبشاربك بعكالك أنعكدت خلص صبر العراق الموت أدمنه عناوين أركضت عالدبكه والتمت على حس الطبل خفن يرجلنه يالبابك وسيعه وعازتك عازه بخيت الينتخي ومحد يحشمنه ياسدرة شواطي وكل زمانك كيض يكصدها اليتيه أغصان فيّنه ياعيطة نخل وعروكها أمتدت ترضع بالتراب التمر عسلنه ***