|  الناس  |  المقالات  |  الثقافية  |  ذكريات  |  المكتبة  |  كتّاب الناس  |
 

     
 

الخميس  15 / 8 / 2013                                            حامد كعيد الجبوري                                         كتابات أخرى للكاتب على موقع الناس

 
 

 

( نصيحة موت )

حامد كعيد الجبوري

أنصحك يا كلب عوف العتب واللوم
رجلك بالكبر ومعلك أبشعره
ستين أعبرت شتريد عمرك نوح
وحفار الكبور أمكابل الحفره
لا تكتب شعر تتغزل بمحبوب
الميهزه الشعر ما يعرف القدره
أنصحك باب كلبك قفله بالمفتاح
وأخذ مفتاح كلبك بالبحر شمره
بطل يا عشك يا شوك يا محبوب
والبعمرك أمدوهن ينتظر كبره
***
كضيت العمر نحله وتطوف ورود
لحد آخر محطة وما نلت زهره
ألوان الزهر وأعرف عسلهن وين
أتيه للورد ويصيح ألي عطره
آيات الشعر قرآن للعشاك
وعذرا ما يصح تتغزل أبصخره
ما أكتب غزل ألا وتذوب الروح
وأنت آخر خساره وما بقه نخسره
( قيس بن الملوح ) عاشك ومجنون
وب( ليلى ) أبتله وأشتهرت بشعره
مو ابن ( الملوح ) آنه أبن جبور
و( بت الناس ) شعري الخاطره تكسره
أصبر عالهجر متعلم الحرمان
مثل ( قيس ) أصطبر وتعلمت صبره
ناقوس الشعر ويكّعد الغافين
يصل كلب الحبيب وعمداً ينكره
سديت الكلب والغزل بطلناه
واليكتب غزل يجوّي الكلب جمره
أشيّع روحي بيدي وللكبر أختار
ولا ريدك تجيني وفاتحه تقره
***



 

 

 Since 17/01/05. 
free web counter
web counter