| الناس | الثقافية |  وثائق |  ذكريات | صحف | مواقع | للاتصال بنا |

موقع الناس .. ملتقى لكل العراقيين /  ديمقراطي .. تقدمي .. علماني

 

 

حامد كعيد الجبوري

 

 

 

الثلاثاء 14/12/ 2010

 

حـمـد

حامد كعيد الجبوري

مهداة لشيوعيي العراق

حمد ...
يبن الليالي السود
الطلكَن ، جابن الغبشه
حمد عكد (البيات) .. أيفوح 
(1)
من طيب الوطن رشَه
بصفوف الوطن أول
وهويته جانت المنجـَل....
يزرع رازقي وقداح
ويّباري بالكلب هرشه
أبيمينه هيبة الجاكوج
يدك التخت للعريس...
وللظالم ،...نجر نعشه
حمد ، مينام ليل الظيم
ويكرم للوطن فرشه

حمد...
لا دنك ولا ذل ...
ولا كال الدرب وحشه
يحب الناس وتحبه...
وبكلوب الشعب عرشَه
بيه سايه حَمد ....
والسايه ظلت بيه
شما يكبر حمد....
بيه تكبر اللولـَه
حب الطيب ....
حب الخير..
حب الناس...
وحُب الوطن بيه سوله
حمد جرحه جبير ، أجبير
على طول الوطن طوله
من تغفه الشمس (حمدان)
يحط أبكلبه مكواره
(عين الذيب عيب أتنام)
(2)
يظل أيناطر الجاره
عينه عالسلـف ، لو جاع
يوكـّل زنده خطاره ..
حمد محله السوالف ...
تضحك أبحلكه
لا سده المضيفه ولا طفت ناره
حمد ثارات أله أشكابين
ويسامِح ما طلب ثاره
ديوانه بخيت ويحشِم الزاره
حمد حب الوطن
حد العَظُم عشكَه
وكلبَه للوطن شده
أشكد حب الوطن ، حبه
وسلّملَه الوطن رايه
وبيده شايل الورده
طش الورد فوك الراس...
وعلك رايته بخده

 


(1) البيات / زقاق في محلة الوردية بمحافظة بابل
(2) عين الذيب عيب تنام / شطر من قصيدة للرمز العراقي مظفر النواب

 

free web counter